Аким кылам деп ири сумма алып кеткен жаран кармалды

Бишкек шаарында алдамчылыкка шектелген жаран кармалды. Бул тууралуу Октябрь РИИБдин басма сөз кызматы кабарлады.

Маалыматка ылайык, 25-май күнү Октябрь райондук милициясына калаа тургуну арыз менен кайрылган. Анда март айынын башында чала тааныш адам арыз ээсине Ош облусунун райондорунун бирине аким болууга жардам берем деп 9 миң 700 доллар каражатын алып, из жашырып кеткенин жазган.

Бул факты Кылмыштардын жана жоруктардын бирдиктүү реестрине 204-беренеси “алдамчылык” менен катталып, сотко чейинки өндүрүшкө алынган.

“Октябрь РИИБдин кызматкерлери шектүүнү кармашты. Ал 1958-жылы туулган О.А. экендиги аныкталды. Шектүү соттун чечими менен 2 айга СИЗО-1 абагына камакка алынды”,-деп айтылат маалыматта.

Учурда милиция шектүүнүн мындан башка дагы кылмыштарга тиешеси бар-жогун иликтеп жатат. Ага байланыштуу О.А.дан жабыр тарткан же кандайдыр бир маалыматка ээ болгон адамдар 0550 102 223 телефон номуру же «102» кызматы аркылуу укук коргоо органдарына кайрылса болот.