Жол кырсыктары эмнеден улам көбөйүп жатканы боюнча 4 учур айтылды

Кечээ, 1-сентябрь күнү Жол кыймылынын коопсуздугун камсыздоо башкы башкармалыгынын кызматкерлери менен Ош облусундагы жол тескөөчүлөр биргеликте узак жолго айдаган айдоочуларга түшүндүрүү иштерин жүргүзүштү. 

 Жол кырсыктарын алдын алуу жана болтурбоо максатында Ош-Бишкек, Ош-Исфана,Ош-Эркечтам унаа жолунда жүргүнчүлөрдү ташыган айдоочуларга жол эрежесин сактоо боюнча түшүндүрүү иштери жүргүзүлгөн.

 Түшүндүрүү иштеринин жүрүшүндө жол кырсыгынын болуп жатканынын 4 себеби айтылды: 

-айдоочу уктап, эс албай жолго чыкканы;

-ролду мас абалында башкаруу;

- каттуу ылдамдыкта айдоо;

-карама-каршы тилкеге чыгып, жарышып айдоо

 Соңку учурларда адам өмүрү кыйылган жол кырсыктарында, негизинен айдоочулардын убагында эс албай, уктап кеткени себеп болгон. 

 Акыркы 7 ай ичинде Ош облусунун аймагында 425 жол кырсыгы катталып, 738 жүргүнчү денелеринен ар түрдүү жаракаттарды алышса, 75 жаран өмүр менен кош айтышкан.

Ош ОИИБдин басма сөз кызматы