Өлкөдөгү көзгө басар жөө күлүктөрдүн бири болгон Дарья Маслова карьерасын жыйынтыктаганын жарыялады

Жеңил атлетика боюнча Кыргыз улуттук курама командасынын мүчөсү Дарья Маслова карьерасын жыйынтыктады. Бул тууралуу ал социалдык тармактагы баракчасына жазды. "Мен бул жаңылыкты кыргыз эли жана күйөрмандарым менен бөлүшкүм келет. Мен көпкө ойлондум жана өзүм үчүн абдан оор чечим чыгардым. Менин профессионалдык карьерама чекит коюуга убакыт келди! Айтып кетейин дегеним, Кыргыз өлкөсүндө спортту колдоо керек. Улуттук спорттун түрлөрү маанилүү, бирок башка түрлөрүн дагы унутпоо керек. Мамлекет бир күнү өзүнүн баатырларын, өлкөнүн патриотторун байкап, биз албаган тийиштүү колдоону көрсөтөт деп ишенем", - деп жазды Маслова. Мындан тышкары ал жеке машыктыруучусуна, күйөрмандарына ыраазычылыгын билдирген. Дарья Маслова эки жолу Олимпиада оюндарына катышкан (Рио-2016 жана Токио-2020). Ошондой эле 2018-жылы Индонезияда өткөн Азия оюндарында алтын жана күмүш байге уткан. 2 жолку Азия чемпиону болгон.