Москвада футбол күйөрмандарын сүзүп алган Чыңгыз Анарбек уулу соттон акталды

Өткөн жылдын жай айларында Москвада жөө жүргүнчүлөрдү сүзүп алган Чыңгыз Анарбек уулу акталып, абактан бошотулду. Бул тууралуу “Замандаш” партиясынан билдиришти.

Ага ылайык, үстүбүздөгү жылдын 8-февралында Смоленск облусунун соту Чыңгыз Анарбек уулун мөөнөтүнөн мурда бошотуу өкүмүн чыгарган.

“Алгач прокурор каршы болуп жатты. Азыр баары жакшы болуп бүттү. 19-февралда мени абактан чыгарышат. Бошоткон соң эки жума кармашат экен. Кыргыз элимдин колдоосу үчүн ыраазымын”, - деди Чыңгыз Анарбек уулу.

Эске салсак, 2018-жылдын 16-июнунда Москва шаарында футбол боюнча дүйнө чемпионаты өтүп жатканда такси жолдон чыгып кетип, жөө бараткан кишилерди сүзүп алган. Унааны кыргызстандык Чыңгыз Анарбек уулу багкарып бара жаткан.

2018-жылдын октябрь айында кыргызстандык жаранды Москва шаарынын Тверск соту 1 жыл 6 айга кара жумушка тартуу менен айлык маянасынан 15%ын кармай турган болуп, 3 жылга чейин унаа айдоо укугунан ажыраткан болчу.